Бројот на жртви во експлозијата на гас во рудник за јаглен во северна Кина се искачи на 90, додека уште девет лица сè уште се водат како исчезнати, соопштија локалните власти, пренесуваат кинеските медиуми.
Несреќата се случила во градот Чангжи, во покраината Шанкси, во рудникот за јаглен Лиушан, кој се наоѓа во округот Кинјуан. Според досегашните информации, експлозијата одекнала во петокот во 21:43 часот по локално време, кога под земја се наоѓале вкупно 247 работници.
До 6:00 часот утрото по локално време, 201 рудар биле безбедно извлечени на површината, објави „Чајна дејли“.
Од штабот за спасување информираат дека операцијата сè уште трае, а спасувачките екипи продолжуваат со пребарување на теренот и со активности за пронаоѓање на исчезнатите лица.
Кинеската новинска агенција Синхуа објави дека надлежните лица од компанијата што управува со рудникот, групацијата Тонгжу, се приведени додека се утврдуваат околностите што довеле до трагедијата.
ПОПУЛАРНО НА ИНТЕРНЕТ...
