Американските воени претставници развиваат нови планови за напади врз иранската одбрана во Ормускиот теснец доколку се распадне сегашниот прекин на огнот, дознава CNN од повеќе извори запознаени со планирањето.
Новите опции вклучуваат „динамично таргетирање“ на иранските сили во самиот теснец, јужниот Персиски Залив и Оманскиот Залив. Фокусот би бил на уништување на мали моторни чамци, мини-полагачи и други асиметрични адути што Техеран ги користи за да ги држи клучните морски патишта под блокада.
Токму оваа блокада предизвика потреси во глобалната економија и ги загрози напорите на Доналд Трамп да ја ограничи инфлацијата во Соединетите Држави. Иако прекинот на огнот е во сила од 7 април, теснецот останува затворен за меѓународен сообраќај.
Нова стратегија
Додека во првиот месец од војната бомбардирањето беше насочено кон цели длабоко во Иран за да се овозможи продор во внатрешноста, новите планови предвидуваат концентрирана кампања околу стратешките водни патишта.
Разузнавачките проценки, претходно објавени од CNN, покажуваат дека голем процент од крајбрежните ракети на Иран остануваат недопрени. Исто така, Иран има голем број мали бродови кои можат да послужат како платформи за напад, што значително ги комплицира американските напори за насилно отворање на теснецот.
Експертите и бродските компании предупредуваат дека само воените напади веројатно нема да го отворат патот за бродовите веднаш. „Сè се сведува на тоа колку ризик е подготвен Трамп да преземе и да почне да турка танкери низ теснецот без 100-процентна гаранција дека иранската закана е уништена“, рече еден од изворите.
И иранските лидери би можеле да бидат цели
Покрај воената машинерија, американските планери развиваат опции за таргетирање на одредени ирански лидери кои ги сметаат за „пречки“ на преговорите. Ахмад Вахиди, командант на Исламската револуционерна гарда, се издвојува меѓу нив.
Во четврток, Трамп тврдеше на социјалните мрежи дека иранскиот режим „се урна“ откако во заедничките операции на САД и Израел загинаа голем број високи функционери, вклучувајќи го и врховниот лидер. Тој ги опиша конфликтите во Иран како „лудило“ меѓу тврдокорните кои губат на фронтот и умерените кои се обидуваат да преговараат.
„На Иран му е многу тешко да сфати кој е нивниот лидер! Тие едноставно не знаат!“, напиша Трамп./Извор:Makfax
