Делегација од Уставниот суд ги посети Европскиот суд за човекови права и Советот на Европа. За време на посетата, членовите на делегацијата се запознаа со работењето на овие клучни европски институции, присуствуваа на рочишта и презентации и остварија средби со судии и правни експерти.
Делегацијата присуствуваше на рочиште во Големиот совет на Судот по предметот Tergek v. Türkiye (бр. 39631/20) и се запозна со работните методи и процедурите на Судот.
Во текот на посетата, членовите на делегацијата учествуваа во обуки за работењето на Судот, се запознаа со базата на податоци HUDOC и платформата за размена на знаења, како и со процедурите за администрација и менаџмент на случаи. Исто така, се запознаа со активностите на Одделот за извршување на пресуди.
Делегацијата ја посети и Парламентарното собрание на Советот на Европа, каде беа презентирани Програмата HELP и работата на Канцеларијата на Комесарот за човекови права.
За време на сите активности, членовите активно учествуваа во состаноци и презентации, ги анализираа процедурите и механизмите за заштита на човековите права и добија практични насоки за унапредување на работата на Уставниот суд.
Посетата беше оценета како исклучително продуктивна, со значајна размена на знаења и искуства и со јасна перспектива за унапредување на соработката помеѓу Уставниот суд, Европскиот суд за човекови права и Советот на Европа. Оваа посета ја организираше Делегацијата на Европската Унија преку проектот за владеење на правото и јакнење на капацитетите, финансиран од ИПА 3 програмата.
Делегацијата на Судот беше предводена од Генералниот секретар, м-р Виолета Ѓорѓиевска, шефот на кабинетот на претседателот Љубица Гаџовска, советниците Татјана Јањиќ-Тодорова, Александар Лазов, Јасмина Симоновска, Марина Пеливанова-Димовска, Христина Беловска и Лариса Милевска, како и експертите ангажирани на Проектот, тим-лидерот Карстен Манке, Мартин Сопронов и Виктор Гратакос. Посетата во Стразбур се реализираше во периодот од 3 до 7 март 2026 година.
