Институтот за јавно здравје денеска објави дека добиените 7 примероци биолошки материјал од учениците во Основното училиште Димо Хаџи Димов, 6 се позитивни на норовирус.
Пред неколку дена повеќе деца од училиштето „Димо Хаџи Димов“ од Влае се пожалија на стомачни тегоби, со повраќање, а според последните информации причинител за тоа бил Норовирусот.
Што е всушност Норовирус?
Норовирус е еден од најзаразните вируси кој предизвикува акутен гастроентеритис – воспаление на желудникот и цревата. Вирусот често се нарекува и „зимски вирус на повраќање“ поради тоа што најмногу се шири во зимските месеци, но може да се појави во било кој период од годината.
Според епидемиолозите, норовирусот се пренесува исклучително лесно – преку директен контакт со заразена личност, контаминирана храна или вода, како и преку површини што ги допираат многу луѓе. Доволни се само неколку вирусни честички за да се развие инфекцијата.
Симптомите се појавуваат брзо, во рок од 12 до 48 часа, а најчесто вклучуваат:
-
ненадејно повраќање,
-
воденеста дијареја,
-
гадење и болки во стомак,
-
замор и малаксаност,
-
понекогаш ниска температура.
Иако симптомите обично траат кратко – од 1 до 3 дена – вирусот е особено ризичен за деца, постари лица и хронично болни пациенти поради можната појава на дехидратација.
Лек против норовирус не постои, а терапијата се сведува на рехидратација, внесување електролити и одмор. Лекарите советуваат да се избегнуваат големи групи луѓе доколку се појават симптоми, како и да не се посетуваат работни места, училишта или градинки за да се спречи понатамошно ширење.
Од здравствените институции потенцираат дека превенцијата е клучна, а најважните мерки се:
-
темелно миење раце со сапун,
-
дезинфекција на површини,
-
внимателно миење на овошје и зеленчук,
-
избегнување консумирање недоволно термички обработена храна,
-
изолација при симптоми.
ПОПУЛАРНО НА ИНТЕРНЕТ...
