Поранешна филипинска градоначалничка обвинета за врски со кинески криминални банди е осудена на доживотен затвор откога судот ја прогласи за виновна за трговија со луѓе, соопшти владината агенција за борба против криминалот.
Алис Гуо беше градоначалничка на Бамбан, земјоделски град северно од главниот град Манила, како лажна филипинска државјанка, а подоцна беше идентификувана од страна на органите за спроведување на законот како кинеската државјанка Гуо Хуа Пинг.
„Оваа долгоочекувана пресуда не е само правна, туку и морална победа. Таа им носи правда на жртвите, го потврдува единствениот став на владата против организираниот криминал“, објави Канцеларијата за борба против организираниот криминал (PAOCC).
Адвокатот на поранешната градоначалничка не одговори на барањето за коментар. Гуо претходно негира врски со криминалци и тврдеше дека е филипинска државјанка по раѓање.
Филипинскиот Сенат почна конгресна истрага за Гуо во мај минатата година, два месеца откога полициска рација откри центар за измами во зграда и на земјиште делумно во сопственост на Гуо. Тоа беше еден од многуте такви центри што никнаа во Југоисточна Азија во последните години.
Рацијата откри стотици жртви на трговија со луѓе, вклучувајќи и странски државјани, и резултира со тоа што PAOCC поднесе тужба за трговија со луѓе против Гуо. Судот исто така осуди уште седум лица за трговија со луѓе и ги осуди на доживотен затвор, соопшти PAOCC.
Случајот ги разбранува Филипините, каде што сомнежите за кинески активности растат поради ескалацијата на тензиите во Јужното Кинеско Море, каде што двете земји имаат територијални спорови. Гуо првично избега од земјата, но подоцна беше уапсена во Индонезија и депортирана на Филипините во септември 2024 година.
Поранешната градоначалничка се соочува и со други кривични обвиненија, вклучувајќи корупција и перење пари./Извор:Makfax
