На 21 јуни, во првиот викенд од летната сезона, министерот за транспорт и врски Александар Николоски и директорот на ЈП за државни патишта Коце Трајановски свечено пресекоа лента за шесткилометарскиот сегмент Подмолје – Охрид, претставувајќи го како „нов автопатски правец“ кон езерскиот туристички центар. Во официјалното соопштение министерството нагласи дека „делницата се пушта за сите возила“ и дека изградбата „напредува според динамиката“, без дополнително објаснување за режимот на сообраќај, пишува Рацин.мк
Реалната слика на теренот е поинаква. Сообраќајот се одвива двонасочно по само една коловозна лента, со привремени жолти ознаки, шљунак каде што треба да има банкини и незаштитени стрмни падини. Втората спротивна лента неопходна за статус на автопат – е сè уште во фаза на земјени работи и машински ровови. Недостига комплетна вертикална сигнализација, нема ленти за застанување ниту бетонски заштитни бариери, а хоризонталното обележување е делумно. Патот, практично, функционира како проширен локален/регионален правец, а не како поделена автопатска траса со четири ленти.
Ова привремено решение доаѓа во момент кога дневниот прилив туристи но и дневна употреба на луѓе кои живеат во охридско/струшкиот регион предизвикува сериозни застои но и опасност посебно при исклучувањето од Струга кон Охрид.
На спустот од превојот Пресека градиентот надминува седум проценти, а тесниот профил без разделна бариера создава колони тешки камиони и автобуси што се движат со 30–40 км/ч. Доколку при спустот возите повеќе од 40 км, сериозна е шансата да завршите во делот кој се гради наместо пуштениот автопат од проста причина што по кривините нема ни 30 метри до првото вклучување и импровизирани сигнални средства кои ве упатуваат каде да се приклучите.
Институционалниот наратив е оптимистичен. Министерот Николоски повтори дека целиот автопат Кичево – Охрид ќе биде готов до октомври 2026 и дека „вечерва ги гледаме првите резултати од засилената динамика“. Ни збор дека сообраќајот се пушта само на половина профил, ни појаснување за безбедносните ризици. Сличен тон има и јавното претпријатие, кое во своето соопштение ја нагласи „коректната соработка со изведувачот“ и „значајното олеснување за туристичкиот сообраќај“, но го прескокна фактот дека трајните решенија ќе дојдат дури по дополнителни работи и приемни технички контроли.
За јавноста останува отворена дилемата: зошто делница што објективно не ги исполнува критериумите за автопат е претставена како готова, наместо како фаза во градба со привремен режим? И колкава е цената – финансиска и безбедносна – на одлуката да се пуштат двосмерни колони по недовршен коловоз токму во пикот на туристичкиот притисок?
Додека официјалните изјави зборуваат за „историски чекор“, возачите на пат кон Охрид и натаму делат една лента во две насоки, со ограничување од 40 до 60 км/ч и внимателност што повеќе прилега на регионален отколку на „концепт на модерен автопат“.
Извор: Racin.mk
ПОВЕЌЕ ОД ИНТЕРНЕТОТ...
