По повод трагедијата со пожарот во дискотека во Кочани, која силно ја потресе целата земја и Регионот, претседателот на Собранието, Африм Гаши, испрати телеграма со сочувство до семејствата на жртвите.
„Со неверување и најдлабока тага ја примив веста за тешката трагедија во Кочани, каде што во огнена стихија во ноќен клуб животот го загубија повеќе од 50 лица и десетици други се повредени. Во мое лично име и во име на Собранието на РСМ, изразувам најискрено сочувство до семејствата на жртвите. Нашите мисли и молитви се со сите погодени од оваа трагедија“ – стои во телеграмата со сочувство.
Претседателот на Собранието ја посети и Клиниката „Свети Наум Охридски“ во Скопје, каде се хоспитализирани дел од повредените во несреќата. Тој изрази најдлабоко сочувство до семејствата на починатите и повредените. Тој порача дека во овој траорен момент сплотени заедно треба да направиме сѐ што можеме како држава, како институции и да помогнеме на семејствата.
При посетата на болницата, Гаши ги охрабри повредените и, притоа, изрази благодарност за залагањето до директорот на Клиниката, до сите доктори и целокупниот медицински персонал, кои најпрофесионално ја извршуваат својата работа на овој тежок ден. Исто така, ги повика надлежните власти да се ангажираат за целосно расветлување на случајот.
