Конечно Работнички се враќа на шампионските патеки, ви благодарам за тоа, им порача градоначалникот на Општина Центар Горан Герасимовски на кошаркарите пред утрешниот натпревар со Гостивар. Градоначалникот Герасимовски ги исполни ветувањата дека ќе го врати клубот на победнички патеки. Од некогашен шампион клубот западна во долгови но напорната работа и очигледна посветеност за две години по двата нови спонзори, финансиските средства од општината и промена на менаџментот клубот повторно изби на првото место.
„Сакам да се заблагодарам пред се и на тренерот на цел стручен тим но и на сите играчи за одличните резултати коишто ги имаме годинава. Успеавме со клубот од невозможно да направиме возможно. Клубот којшто го начекавме пред две години на 10то место со 4-5 неисплатени плати и долг од 600 000 евра да го вратиме на победничките патеки. Важно е што во моментов табелата трепка што сме на прво место и се надевам дека тоа така ќе остане и до крај. Јас верувам дека ќе имаме успех оваа сезона и уште поголем успех следната“, им порача Герасимовски на кошаркарите.
При средбата Герасимовски ги извести играчите дека Општина Центар го има имотниот лист на салата и успеа да го исполни ветувањето дека ќе ја врати сопственоста на салата под ингеренции на општината. Општина Центар на крајот на минатата година доби финансиски средства од Владата во вредност од 30 милиони денари наменети за реконструкција на салата, при што Герасимовски ги информираше играчите со процесот и проект планот кој е веќе во изработка за реновирање на матичната сала на Работнички.
