5.8 C
Скопје
27. февруари 2024
Centar.mk – Вести, бизнис, забава, спорт…
МАКЕДОНИЈА

Манолева: Дополнителната заменик министерка за финансии Елена Петрова го блокира процесот на вработување на 1.117 лица во јавното здравство

Заменик министерката за здравство д-р Маја Манолева, денеска одржа прес-конференција на која информираше дека дополнителната заменик министерка за финансии, Елена Петрова го блокира процесот на вработување на 1.117 лица во јавното здравство.

Во продолжение, ви го пренесуваме нејзиното обраќање во целост:

-Денешната прес-конференција ја користам да упатам сериозна загриженост поради неодговорното однесување на дополнителната заменик министерка за финансии од ВМРО-ДПМНЕ, Елена Петрова, која го блокира процесот на вработување на 1.117 лица во јавното здравство. Ова не само што е неодговорно, туку е и опасно за нашето здравство, за граѓаните и за вработените во здравствениот систем.

Да потсетам, Владата обезбеди решение за статусот на најголем дел од вработените во здравството со договор на дело и на неопределено време. Со одлука на Владата се обезбедени вработувањата на 1.117 лица во здравството.
Но, овие вработувања се блокирани од дополнителната заменик министерка за финансии, Елена Петрова, само неколку дена пред изборите, без посебна причина, без тронка одговорност кон вработените во здравствените установи и без тронка грижа кон пациентите на кои им е потребна професионална грижа и нега. Ова не може да се дозволи!
Никој, посебно не функционери во извршната власт, не смеат да играат со судбината на 1.117 млади здравствени работници и да претставуваат главна пречка во работата на здравствените установи.

Нашите доктори и здравствени работници се една од најголемите вредности во нашата држава. Тие ги заштитуваат нашите животи, го подигнуваат квалитетот на здравство и се борат за нашата здравствена состојба. Ние не можеме и не смееме да дозволиме ваквите политички игри да ја стават под ризик работата на здравствените работници.
Младите доктори и македонското здравство не се тема за политика. Тие се претставници на здравјето на граѓаните и мора да бидат заштитени и потпомогнати во секој аспект, без разлика на политичките збиднувања во државата.

Ваков тип блокади досега немало и не смее ова да стане политичка пракса, затоа што унапредувањето на здравствениот систем во земјава не смее да зависи од несовесното однесување на поединци. Нашите доктори докажаа дека тука можат да изведуваат софистицирани интервенции, од најсложени операции до трансплантации коишто во минатото ги немало.
Затоа сите оние млади доктори и други здравствени работници коишто работат во моментов под договор треба да го продолжат своето работење во јавните здравствени установи и да го надополнуваат својот, меѓутоа и здравствениот капацитет на државата. Покрај овие 1117 лица, од јавно-здравствените установи веќе е побарано до Министерството за финансии да одобри дополнителни вработувања на неопределено време, со што би се искористил потенцијалот за вработување на нови здравствени работници (доктори, медицински сестри…) и помошно технички персонал.

Овие вработување се и една од мерките како да се задржи младиот и стручниот кадар во Северна Македонија. Затоа, јавно барам од дополнителната заменик министерка за финансии веднаш да го одблокира процесот и да ги потпише документите.
Овие лица се клучни за напредокот на нашето здравство, особено со големиот број на универзитетски кадри и големи општи болници и здравствени домови. За овие работи мора да бидеме совесни, да го ставиме здравјето на граѓаните пред сè друго, мораме да ги заштитиме нашите доктори, здравствени работници и пациенти, без притоа да дозволиме да бидат дел од политичките игри што носат штета за општото добро на сите граѓани во Република Северна Македонија, изјави Манолева.