Пратениците на Левица, Димитар Апасиев и Борислав Крмов предизвикаа инцидент во Собранието откако почнаа да ги фрлаат нивните предложени амандмани, но и предметите што се наоѓаат на масата на претседателот на Собранието. Исто така беа користени и повисоки тонови.
Дел од листовите хартија беа расфрлани кон потпретседателот на Собранието, Горан Мисовски, кој претседаваше со седницата. Беше искршен и компјутерот, на кој што работат претседателот и потпретседателот на Собранието.
Сепак потпретседателот Мисовски остана воздржан и не падна на провокацијата на двајцата пратнеици.
Двајцата пратеници претходно побараа да се прекине седницата бидејќи дел од нивните амандмани не се архивирани.
Пратениците со 87 гласа за и 3 против го усвоија дневниот ред во Собранието.
Апасиев сметаше дека без преседан е фрлањето на 2500 амандмани и дека Собранието се става над Уставот.
Пратениците побараа седницата да биде прекината додека нивните амандмани не бидат разгледани. По ова, Мисовски беше принуден да даде половина час пауза.
