Горење очи, заматен вид, главоболки и отежнато читање се само некои од симптомите на проблеми со видот, кои се многу почести кај луѓето чија работа е поврзана со компјутери.
Но, постојат голем број чекори што можете да ги преземете, велат експертите.
Проблемите со видот често се меѓу првите последици од стареењето. Овие здравствени проблеми најмногу ги погодуваат луѓето кои се на возраст од околу 40 или повеќе години. Сепак, немојте да мислите дека сте на милост и немилост на очните болести, бидејќи постојат голем број чекори што можете да ги преземете за да ги спречите и лекувате.
Обрнете внимание на здравјето на очите
Луѓето кои работат на компјутер треба да обрнат посебно внимание на здравјето на нивните очи. Редовните посети на офталмолог и преземањето основни чекори за да се спречи штетноста од гледањето во монитор се од суштинско значење.
Ако сакате да направите само една работа за здравјето на вашите очи, направете посета на офталмолог за да може навремено да се открие оштетување на очите или болест.
Имено, повеќето очни болести може да се лекуваат доколку се откријат доволно рано, често со едноставни методи како што е употребата на капки за очи.
Како да се намали штетата од гледањето на екранот?
Еден од најштетните фактори за работа на компјутер е близината на екранот. Во тоа може да ви помогне правилото 10-3-10, според кое на секои 10 минути ќе го насочувате погледот три метри пред себе по 10 секунди, со што ќе ја намалите напнатоста во очите.
Исто така, вашите очи ќе ви се заблагодарат ако го поставите бирото на место каде што можете да ја видите најоддалечената точка од собата, бидејќи на овој начин ќе го користите и вашиот периферен вид и повремено ќе го оттргнете вниманието од екранот.
Кога станува збор за осветлувањето, ако воопшто можете, не држете го компјутерот близу до прозорец бидејќи прекумерната надворешна светлина предизвикува дополнителен стрес на очите, исто како и сјајот на мониторот, кој можете да го елиминирате со исклучување на вишокот на задно осветлување.
Исто така, избегнувајте да работите во затемнета просторија каде единствениот извор на светлина е мониторот, бидејќи тоа ќе го оштети вашиот периферен вид.
Што ако забележите промени во видот?
Меѓу најчестите први симптоми на проблеми со видот се проблеми со читањето, печење на очите, заматен вид, главоболки и двоен вид.
Ниту еден од горенаведените симптоми не треба да се игнорира, особено ако поминувате неколку часа дневно работејќи на компјутер. Ситуацијата може само да се влошува со текот на времето.
Првото нешто што многу луѓе го прават кога ќе им се промени видот е да одат до најблиската продавница за да набават очила. Сепак, носењето случајни рамки без точен рецепт и преглед може да биде многу штетно.
