Поврзувањето на училиштата и бизнис заедницата е еден од приоритетите на Министерството за образование и наука, затоа што таа релација придонесува за создавање квалитетни ученички генерации, добро подготвени за успешен настап на пазарот на трудот веднаш по стекнувањето на дипломата, но и за понатамошно продолжување во високото образование. Благодарен сум за поддршката која ја добиваме од бројните домашни и меѓународни партнери во постигнувањето на целта и очекувам нашата соработка да продолжи и во индина, преку заедничко унапредување и проширување на концептот на дуално образование.
Ова го истакна министерот за образование и наука Јетон Шаќири на денешното доделување на грантови на конзорциуми составени од компании и образовни установи за стручно образование и обука, кои од Регионалниот фонд за предизвици добиваат средства за набавка на опрема што ќе служи за подготовка на учениците во практичниот дел од наставата.
„Дуалното образование почна од учебната 2017/2018 година а се интензивираше во последните три, со социјалниот дијалог „Учи паметно, работи стручно“, преку кој компаниите, средните стручни училишта, стопанските комори и локалните самоуправи ги разгледуваат потребите за отворање на нови образовни профили и паралелки во училиштата, потребата од редизајнирање на дел од наставните програми и унапредувањето на практичната обука на учениците“, рече Шаќири.
Тој додаде дека како резултат на интензивирањето на активностите во учебната 2021/2022 година, дуално образование се реализираше во 97 паралелки во 46 средни стручни училишта, а беа запишани 1.486 ученици, кои соработуваа со 210 компании. Оваа учебна година дуално образование се реализира во 225 паралелки во 61 средно стручно училиште, со 2.763 запишани ученици и во соработка со 450 компании. Бројките за следната учебна година се уште повисоки. Во Конкурсот за запишување ученици во јавните средни училишта за учебната 2023/2024 година предвидени се 259 дуални паралелки со вкупно 6.475 ученички места во соработка со над 500 компании.
„Со цел да ја зголеми атрактивноста на дуалното образование, Министерството за образование и наука ги промени и политиките за стипендирање, односно за учениците запишани во дуално образование доделува стипендии во месечен износ од 3.500 денари за 9 месеци во годината“, рече Шаќири, додавајќи дека како дел од реформата на средното стручно образование предвидено е и донесување на нов Закон за стручно образование и обука кој треба да овозможи стручно образование кое ќе содејствува на пазарот на трудот.
Шаќири изрази безрезервна поддршка на целиот процес на Регионалниот фонд за предизвици, кој е финансиски инструмент дизајниран да ја зголеми вработливоста на младите. Се работи за иницијатива преземена од страна на Германската развојна банка, а финансирана од германското Федерално министерство за економска соработка и развој. Главниот партнер во спроведувањето е Коморскиот инвестициски форум на шесте земји од Западен Балкан.
НАЈЧИТАНО НА ИНТЕРНЕТ...
