Апелациониот суд во Скопје донесе одлука да одбие жалбата на Жан Митрев, што значи дека сметките на ПЗУ Клиничка болница Жан Митрев од Скопје остануваат блокирани.
Оваа одлука е донесена во врска со кривичниот предмет КЖ-208/23 и по препорака на Основниот кривичен суд Скопје, кој определи привремени мерки за обезбедување имотно-правно побарување на Обвинителството.
Согласно одлуката на Апелациониот суд, привремените мерки вклучуваат забрана за оптоварување и располагање со недвижноста, како и забраната за исплата на износите наведени во изреката на обжаленото решение од сметките на ПЗУ Клиничка болница Ж. М. од Скопје.
Донесената одлука ќе биде објавена на веб-страницата на судот во целост.
Обвинителството во јануари поднесе обвинение против Жан Митрев и неговата приватна клиника, а судот го прифати.
Вкупно 283 пациенти се пријавиле како оштетени, а за кривичното дело кое му се става на товар на Митрев, предвидена е казна затвор од 1 до 10 години.
Третманот на ковид-пациенти во клиниката Жан Митрев ја бранува јавноста уште од јули минатата година, откако на оваа тема ИРЛ го објави документарецот„Нечиста крв“, по што беше отворен и предметот во ОЈО Скопје.
Истражувачката репортерска лабораторија во документарниот филм објави дека дошла до неколку сознанија меѓу кои клучното е дека хемофилтрацијата, за која во Жан Митрев наплаќале по илјадници евра, е клиничка студија која мора да биде пријавена и одобрена од Агенцијата за лекови – нешто што според новинарскиот тим, не било направено.
