„НАТО е тука да ги помага и поддржува сојузниците и сега даваме помош и поддршка на Северна Македонија за справување со различните видови на хибридни и сајбер напади“ изјави генералниот секретар на НАТО, Јенс Столтенберг на прес-конференција пред состанокот на НАТО Министрите за надворешни работи.
Тој додаде дека при посетата на Скопје на тимот на Алијансата биле договорени низа на чекори со Владата на Северна Македонија за справување со ваквите закани.
„Овие чекори се и краткорочни и долгорочни, што НАТО и сојузниците ги преземаат за да ја поддржат Северна Македонија во бранењето против хибридните кампањи со кои се соочува“ рече Столтенберг.
Генералниот секретар на НАТО истакна дека НАТО и сојузниците се подготвени да дадат техничка поддршка на земјава, како и засилена соработка за борбата со дезинформациите.
„Сакам да ја пофалам Владата на Северна Македонија за брзата и детална работа во развивањето на програмата за соработка што ја договоривме“ рече Столтенберг.
