Координаторот на пратеничката група на СДСМ, Јован Митрески во гостувањето во ТВ21 кажа дека идејата на реконструкцијата на Владата, била да застанат на едно место сите проевропски партии, односно европската коалиција наспроти регресивните сили од ВМРО-ДПМНЕ и Левица.

-Мислам дека оваа идеја наскоро ќе се оствари до крај, па и таа што партија што ја напушти власта ќе ја анализира својата одлука. Целта не беше обезбедување двотретинско мнозинство во Собранието, бидејќи тоа прашање ќе зависи и од ВМРО-ДПМНЕ, кажа Митрески.

Според него, многу е значајно да се разбере што ќе значи внесувањето на Бугарите и останатите заедници во Уставот.

-Ние треба да бидеме свесни и сериозни и да не си го побиваме идентитетот самите. Внесувањето на Бугарите ќе значи дека постојат два различни народа, македонскиот и бугарскиот, односно ќе се направи дистинција за разлика од една догма што се споменува, истакна Митрески.

Пратеникот додаде дека се подготвуваат уставните амандмани и расправата во Собранието ќе започне во наредниот период.