Centar.mk – Вести, бизнис, забава, спорт…
CentarМакедонија

Ковачевски: Од Црвенковски барам совети, со Заев зборуваме и за секојдневниот живот

Претседателот на СДСМ, Димитар Ковачевски, тврди дека комуницира со сите свои претходници што раководеле со партијата.

Одговарајќи пред новинарите, Ковачевски посочи дека е во контакт со Бранко Црвенковски, кој е прв претседател на партијата, но и со Радмила Шекеринска, како и со Зоран Заев.

Со сите разговарал за разни теми. Од некои од нив барал и совети.

„Јас имам комуникација со сите експретседатели на СДСМ. Со некои почести, со други поретки. Со првиот претседател, со оглед на зафатеноста и годините, имаме помалку комуникација. Кога ми треба совет, ги слушам сите. Во однос на Бучковски, имав средба пред две недели, на која разговаравме за правни аспекти. Со Шекеринска се слушам на неделно ниво. Со Зоран Заев сум колега од факултет. Нашата комуникација е како и со други колеги од факултет, се сведува и на неполитичка комуникација за разни сфери од секојдневниот живот. Пред една недела имавме разговор и за скринингот – ме прашуваше како е и што е, но не длабински разговор“, изјави Ковачевски.

Од 1990 година до сега СДСМ имаше четири претседатели. Последно фотелјата ја презеде Ковачевски, а претходник му беше Заев.