До сега скрининг процесот се одвива непречено и според календарот кој го дефиниравме со Европската комисија, истакна вицепремиерот за европски прашања Бојан Маричиќ во интервју за ‘Капитал’.
-За да биде појасно за читателите, објаснувачките скрининг состаноците овозможуваат да се запознаеме со новото европско законодавство, а билатералните да ги нотираме недостатоците и да ги дефинираме следните задачи на кои ќе треба да работиме за да ги постигнеме европските стандарди. Целта на овие скрининзи е да покажеме што сме постигнале и што и колку реално е направено. На овој начин доаѓаме до разликата која треба да поправи во текот на преговорите. Имаме добра подготвеност и основа за продолжување со силно темпо на реформирање и капацитет за исполнување на обврските кон ЕУ, но и кон граѓаните, вели Маричиќ.
Според него, конкретнп во Поглавјето 24, „Правда, слобода и безбедност“ земјата има висок степен на усогласување со законодавството на ЕУ, а она на што во следниот период ќе треба да се работи е имплементација.
-Од нас ќе се очекуваат резултати во овие клучни поглавја од Кластер 1, со кој започнуваат и завршуваат преговорите. Темпо на напредок бележиме во Поглавјето 24, „Правда, слобода и безбедност“ во имплементацијата на Заедничкиот акциски план за борба против тероризмот, како и управувањето со границите и миграцијата и многу добра соработката со агенциите за спроведување на законот на ЕУ. Во оваа насока ја засилевме соработката со ЕУ и преку потпишувањето на Договорот со ФРОНТЕКС, кој беше потпишан онака како што ветивме, на чист македонски јазик, без ѕвездички и фусноти. Затоа и овој процес трае повеќе години, за да има време да се надминат сите слабости. Гледаме реално на состојбите и пред Европската комисија настапуваме исто, реално со сите предизвици со кои се соочуваме и во борбата со корупцијата и во правосудството, заклучи Маричиќ.
