„Сметам дека треба да имаме еден општ колективен договор, кој ќе биде пропратен со Закон за плати во државата. Ние немаме закон кој ги унифицира платите. Ако ги погледнете и менаџерските договори на директори на јавни претпријатија кои прават загуби со години и на членови на управни одбори ќе видите поголеми плати од двајца министри заедно“ рече премиерот Димитар Ковачевски во „360 степени“ на Алсат М.
Тој додаде дека потребно е да се ревидираат ваквите менаџерски договори бидејќи тие менаџери не прават ништо за намлување на загубите, не ги намалуваат трошоците, не ги зголемуваат приходите.
„Јас се залагам за конзистентност на платите, тоа го зборуваат и граѓаните и вработените во јавната администрација. И во Извештајот на ЕУ се зборува дека државата има мали капацитети во однос на искористување на европските фондови. Тоа е заради тоа што има луѓе кои се високо квалификувани, кои мора да знаат повеќе странски јазици, а имаат пониски плати од вработени во одредени институции кои не знаат што им се дневните обврски. И затоа си одат“ рече Ковачевски.
Премиерот истакна дека има македонски државјани кои работат во Црна Гора, Хрватска или Босна и Херцеговина за приватни консултантски куќи на европските фондови, а ние не може да ги искористиме.
„Затоа мора да ставиме ред, да се знае кој за што и колку заработува“ заклучи Ковачевски.
