Владата предводена од СДСМ продолжува со засилена поддршка за земјоделството како една од клучните стопански гранки, истакна на прес-конференција пратеничката на СДСМ, Љубица Спасова.
Образложи дека годинава за првпат се воведува Програма за интервентен фонд за земјоделството, вреден 250 милиони денари. Овие средства, како што посочи, главно ќе бидат наменети за поддршка на сточарството и за растително производство, односно житните култури.
„120 милиони денари се наменети за субвенционирање на набавката на вештачки ѓубрива за производителите на пченица и јачмен. Оваа година, поради високата цена на нафтата, направено е усогласување и износот за реализација на мерката ‘зелена нафта’ е зголемен за 13 отсто. Важно е да се напомене дека овој Интервентен фонд е надвор од директните плаќања и руралниот развој, односно останатите видови на субвенции се исплаќаат редовно, навремено и неселективно“, рече Спасова.
Истовремено, Владата донесе одлука со која сите земјоделци што имале штети врз земјоделското производство поради временски непогоди минатата година ќе бидат обештетени во висина од 10 отсто од вкупната проценета штета. Вкупно 729 баратели само во Росоман кои претрпеле штети од измрзнувањето на производството ќе добијат околу 33 милиони денари, а покрај нив со одлуката на Владата ќе бидат обештетени и Карбинци, Богданци, Демир Капија и Ранковце.
Спасова најави дека со ИПАРД 3-програмата, буџетот ќе биде зголемен за 60 отсто, а првиот повик се очекува да биде во вредност од околу 35 милиони евра за поддршка на земјоделството.
Додаде дека во време на глобална економска криза, Владата редовно ја следи состојбата со цел навремено да се набават сите потребни поризводи, граѓаните да бидат спокојни, сите основни намирници ги има во доволна количина.
