„Стопанството се враќа во живот, а економијата расте“, нагласи пратеничката на СДСМ, Марија Ангелова, на партиската трибина во Кочани. Таа додаде дека сега веќе кога пандемијата стивнува, граѓаните се чувствуваат сигурни, а процесот на имунизација се одвива непречено. Ангелова потсети дека ова бил период на предизвици за власта, но и покрај пандемијата и, како што вели, последиците од режимот, Владата предводена од СДСМ успеала да постигне значајни економски резултати.
– Во услови на пандемија, донесовме 6 пакета мерки за поддршка на стопанството и граѓаните. Се сочуваа над 100 000 работни места. По разни дополнителни основи, помогнавме над 400 000 граѓани и над 35 000 компании, изјави Ангелова во Кочани.
Пратеничката на СДСМ сепак истакна дека и пред пандемијата, власта успеала да постигне успеси во економијата, но и на секое друго поле.
-Се зголемија платите на околку 200 000 вработени и тоа во повеќе сектори како што се: здравството, образованието, труд и социјала… За првпат во историјата на нашата држава, се воведе социјалната пензија. За првпат се воведе и поврат на ДДВ. Изградивме и обновивме преку 500 километри патишта, заклучи Ангелова, додавајќи дека земјата е сега веќе и членка на НАТО, притоа со зачуван идентитет.
