Сојузот на стопанските комори на Македонија информира дека пријавувањето за новата кредитна линија на Развојната банка – „Ковид 3“ за дирекно кредитирање микро и мали претпријатија погодени од кризата почнува на 16 и ќе трае до 30 декември.
На 7 декември Развојната банка го објави јавниот повик за третата бескаматна кредитна линија со грант-компонента наменета за микро и мали трговски друштва, трговци поединци, занаетчии (кои плаќаат давачки на реален приход) класифицирани во согласност со тековната состојба. Кредитот е наменет за обезбедување основни и обртни средства заради непречено финансирање на тековните активности и потребата од обртен капитал, како и поддршка при реализација на проекти за купување основни средства во функција на реализација на бизнисот.
Документите за аплицирање се објавени на веб-страницата на Развојната банка кај јавниот повик во делот „Формулари“.
Во рамките на повикот е објавено упатство за пријавување, кое содржи детаљни информации за постапката за изготвување и поднесување на кредитното барање.
Критериум за одлучување при доделување на средствата ќе биде принципот прв дојден, прв услужен.
