Наредба за спроведување истражна постапка за 24-годишен скопјанец кој е осомничен за кривични дела недозволено изработување, држење и тргување со оружје и распрскувачки материи од член 396 став 1, како и неовластено производство и пуштање во промет на наркотични дроги, психотропни супстанции и прекурсори според член 215 став 1 од Кривичниот законик.
Како што информира Основното јавно обвинителство Скопје, осомничениот во текот на април и почетокот на мај годинава, во импровизирани бункери од пластични цевки, закопани во земја во пошумениот дел меѓу улиците „Алпи“ и „Коце Металец“, неовластено држел поголемо количество оружје и муниција, како и наркотична дрога, хероин. „На различни локации биле пронајдени автоматска пушка 70 F 6699 со пластичен кундак и калибар 7,62мм, 27 куршуми за таа пушка, полуавтоамтска снајперска пушка со калибар 7,9мм, автоматско оружје со навој за пригушувач со калибар 7,65мм на кое биле залепени две рамки со 34 куршуми, два пригушувачи, уште три автоматски и една полуавтоматска пушка завиткани во крпи, како и уште 38 куршуми“,се вели во информацијата на Обвинителството.
Освен тоа, во пластично буре била пронајдена наркотична дрога, хероин, со вкупна нето количина од 2 килогирами 326 грама, спакувана во пет пакувања.
Обвинителот доставил предлог за притвор на осомниченото лице.
