Општина Илинден започна со опремување на нова, модерна детска градинка во Миладиновци со која се решава дел од проблемите на близу 4000 жители кои живеат во околните места, вели во писмената изјава која ја пренесуваме во целост градоначалникот на Илинден, Жика Стојановски.
-Општина Илинден е пример дека ВМРО-ДПМНЕ знае и има капацитет да ги води институциите и да работи за добро на граѓаните.
За да ја добиеме таа можност, мораме најпрво да им прикажеме на граѓаните дека сме сериозна структура која води конзистентни политики за добро на државата. Мора прво да ја освоиме нивната доверба и потоа да ја оправдаме истата.
Актуелното раководство на ВМРО-ДПМНЕ имаше три години можност да го стори тоа. За жал не успеа ниту на претседателските, ниту на локалните избори во Охрид и Ново Село, ниту на последните парламентарни избори.
Затоа, време е за вонреден конгрес на кој што ќе избереме ново раководство кое што ќе го врати ВМРО-ДПМНЕ на победничките патеки, пишува Жика Стојановски, Градоначалник на Општина Илинден од редовите на ВМРО-ДПМНЕ и член на Иницијативниот одбор за свикување вонреден конгрес
