Медицинскиот факултет и Амбасадата на Јапонија денеска потпишаа договор за грант за набавка на нов дијагностички ултразвук за тироида и вратна регија.
Станува збор за грант во вредност од 23.165 евра, а новиот апарат ќе се набави преку „Јапонската грант-програма за мали проекти (GGP)“. Како што соопштија од Министерството за здравство, со обезбедувањето нов дијагностички ултразвук за тироида и вратна регија значително ќе се унапредат условите за третман на пациенти со заболувања на тироидата, а воедно ќе се зајакнат капацитетите за дијагностика на Институтот за патофизиологија и нуклеарна медицина.
„Овој апарат е од непроценливо значење и ќе го намали времето на чекање за цитодијагностички пункции, а со тоа ќе ја направи методата подостапна, истовремено подобрувајќи ја дијагностиката на тироидните заболувања. Сакам да се заблагодарам на јапонската амбсада за разбирањето, ангажманот и великодушноста која ја покажаа во оваа и во многу други пригоди претходно. Се надевам и во иднина интензивната соработка ќе продолжи со несмален интензитет со цел да се подобри здравствениот систем и истиот да стане подостапен и поквалитетен, а сето тоа за благосостојбата на нашите пацинти, на сите граѓани на Република Северна Македонија“, посочи министерот за здравство, Венко Филипче.
ПОПУЛАРНО НА ИНТЕРНЕТ...
