Во самите аптеки фармацевтите укажуваат дека нема повеќе метеж, турканици, паника кај пациентите. Во кој било ден од месецот пациентите доаѓаат до потребниот лек со рецепт и тоа навистина се чувствува, изјави министерот за здравство, Венко Филипче, при денешната посета на аптеки во градот Скопје.
Тој потсети дека проектот почна како пилот-проект за време на летните месеци во туристичките места Охрид, Струга, Дојран, Ресен и Гевгелија. Мерката, додаде Филипче, покажа одлични резултати и пациентите во тие региони и градови се задоволни.
„Со имплементирање на оваа мерка имаме задоволни пациенти и граѓани на територијата на целата држава. Мерката што одамна требаше да биде имплементирана оваа Влада ја имплементира со цел да го подобри пристапот до потребната терапија и квалитетот на здравствена заштита“, потенцира министерот Филипче и додаде дека ова е само еден сегмент од комплетната реформа која се имплементира на ниво на примарна здравствена заштита.
Тој најави зголемување на капитациите и бенефит на матичните примарни лекари, кои со години немаа зголемување на капитацијата. Со оваа мерка, рече Филипче, ќе се овозможи подобра работа, надградување на условите и опремата во кои работат матичните лекари, а бенефитот ќе го почувствуваат пациентите.
