Министерството за образование и наука и Педагошката служба и годинава не направија напредок за навремена достава на учебниците, обвини Рашела Мизрахи од ВМРО-ДПМНЕ.
Како што рече таа, учениците се снаоѓаат како знаат и умеат за да дојдат до учебник, а веќе е 25 септември.
„Министерството изјавува дека постапката за избор на компанија која ќе ги испечати количините е во тек и дека поради троми тендерски постапки задоцниле со целокупната постапка. Тоа во превод значи дека техничкото наддавање е завршено и се чека на избор на понудувач“, кажа Мизрахи.
Додаде дека тоа мало задоцнување може да значи дека учениците би ги добиле учебниците околу 20 јануари следната година, односно на почетокот на второто полугодие.
„Дали можеби тромоста на тендерската постапка може да се најде во тежината на тендерот што тежи некаде околу 5 милиони евра, односно 330 милиони денари од коишто 55 милиони денари за превод, а 270 милиони денари за техничкото изготвување на учебниците“, праша Мизрахи додавајќи дека министерот и МОН се должни да понесат одговорност за девастирањето на образованието.
ПОПУЛАРНО НА ИНТЕРНЕТ...
