Заев повика на темелна и независна истрага, која мора да заврши што е можно поскоро и мора да ги покаже сите детали. Резултатот од истрагата мора да донесе преземање одговорност, исклучиво согласно докази и согласно словото на правото, рече Заев.
Премиерот Зоран Заев во своето обраќање до нацијата, покрај тоа што побара одговорност за сите инволвирани во случајот “Рекет”, порача и дека одговорност мора да има и за осмислувачите и за сите оние кои прават сѐ да се спасат и при тоа се претставуваат како жртви.
– Случајот “Рекет” покажува дека она за што се боревме со граѓаните, сите ние заедно, стапува на сцена. Правдата е на потег. Секаде во светот, во било која земја каде власта одлучно и искрено создавала услови да се отвораат истраги против секого каде што имало и најмало сомневање, секаде било тешко и трауматично. Нема да е лесно и кај нас. Ќе биде тешко и ќе има трауми, но само така ќе бидеме држава каде владее правото, само така ќе бидеме држава каква што сите посакуваме, рече премиерот Зоран Заев во обраќањето до нацијата на социјалните мрежи, откако од италијанскиот весник Ла Верита се објавени нови видео снимки.
