Секогаш во средиштето на збиднувањата...

Прво издание на меѓународниот фестивал за краток филм „ФИЛМАЈ”

Во организација на фото-кино клуб ,,Козјак” – Куманово се одржа Прво издание на меѓународниот фестивал за краток филм „ ФИЛМАЈ”. Доделувањето на наградите и фестивалската проекција на наградените и додатни издвоени филмови ќе се одржи на 29 мај (среда) во свечена сала на Занаетчиски дом – Куманово (поранешно кино `Напредок`) со почеток во 19.30 часот.

На овогодинешниот конкурс се пријавија 45 филма од 8 држави (Македонија, Бугарија, Србија, Грција, Германија, Холандија, Турција и САД). 
Тричленото жири составено од Ивица Димитријевиќ (актер, режисер), Мартин Иванов (монтажер, режисер) и Денковски Драган (почесен член на фото-кино клуб `Козјак` – Куманово) ги додели следниве признанија:
– награда `Лазар Ѓорѓевиќ` за најдобра режија на Ото Ројшел (Otto Reuschel) за филмот `Риски` (`RISKI`)
– награда `Радислав Ристевски` за најдобра кинематографија за Росен Савков за филмот `Тими` (`Timmy`)
– награда `Козјак` за најдобро сценарио за Лидија Мојсовска за `Награда` (`Тhe Award`).

Додатни дипломи за особено признание е одлучено да се додели на следниве филмови: `ХАКИЕ – ХАКИ . Живеејќи како маж` на Анабела Ангеловска, `Запирка` на Сезер Салихи, `Мишко` на Ханис Багашов, и `Заб` на Ајдин Ислами. Седумте филма ќе бидат прикажани во фестивалската вечер на 29 мај. Влезот ќе биде слободен (бесплатен) за сите посетители.