Залудни се обидите на Мицкоски преку измислени и непостојни случаи да ја врати државата во темното минато на изолација, уназадување и неизвесност, реагира СДСМ.
„Како што јавно соопшти Владата, поради доцнењето на слетувањето на авионот, а со цел да се исполнат сите активности од агендата, биле изоставени сите протоколарни свечени активности при дочекот, вклучително и гарда, цвеќиња, воени почести, интонирање на химната и слично. Македонската химна ниту била ниту е оспорена или предмет на преговори. Таа досега била интонирана во повеќе пригоди во присуство на официјални претставници од грчка страна и натаму ќе биде интонирана во согласност со протоколите. Македонската химна е признаена од целиот свет“, наведе СДСМ во реакцијата.
Од владејачката партија велат дека Мицкоски продолжува со лицемерството и лажниот патриотизам.
„Вчерашната прва посета на еден грчки премиер на Скопје во 28 години е доказ дека пријателствата носат економски придобивки, успешност на политиките на Владата предводена од СДСМ во намерата државата да стане дел од демократскиот развиен свет. Мицкоски и ВМРО-ДПМНЕ нема да ја вратат државата назад, наместо измислици, нека се подготват за пораз на претстојните избори“, додава СДСМ во реакцијата.
