Силниот југозападен ветер предизвикал проблеми на неколку важни сообраќајници во Македонија. Според вечерното известување на Автомото сојузот на Македонија од 19 ноември, на патниот правец Гостивар – Стража – Кичево, кај клучката Гостивар, биле соборени семафор и канделабра.
Екипите на ЈП „Македонијапат“ ги отстраниле паднатите елементи од коловозот. На истиот патен правец биле регистрирани и паднати дрвја, кои исто така биле отстранети од дежурните служби.
Проблеми од силниот ветер биле пријавени и на правецот Скопје – Тетово, во близина на Карпалак. Возачите кои ќе патуваат во текот на ноќта и во петок треба да бидат внимателни поради можноста од нови паднати гранки, дрвја и други предмети на коловозот.


