Мртов маж со траги на насилство бил пронајден во куќа во кичевско, а според деталните анализи и обдукцијата, несреќниот маж починал како последица од давење. За ова денеска информираат од Основното јавно обвинителство.
Во 13:50 часот во Полициско одделение Осломеј, од 59-годишниот С.Џ. од село Црвевци, кичевско било пријавено дека во село Црвевци во куќа во сопственост на 75-годишниот Б.Б. го пронашол починат со видливи повреди. Од ОЈО денеска велат дека починатиот, 75-годишен жител на селото живеел сам во куќата. Поради сомнение за причините за смртта која настапила кај лицето, јавниот обвинител нареди обезбедување на трагите на лице место и вршење обдукција на телото на починатиот. Од обдукцијата произлезе дека починатиот настрадал од насилна смрт – давење.
Во насока на целосно расчистување на кривично правниот настан, по издадена наредба на обвинителството повторно се врши увид на лице место со цел прибирање траги и докази од местото каде е извршено кривичното дело.
