Во интервју за порталот „Независен“, кандидатката за градоначалник на Град Скопје, Каја Шукова, зборува за својата визија за развој на главниот град, за плановите што сака да ги реализира.
,,Мој приоритет е Скопје повторно да функционира системски. Јавните претпријатија мора да почнат да ги извршуваат своите основни обврски чистење, уредување, водоснабдување, транспорт. Денес гледаме дека голем дел од тие функции се замрени и дека граѓаните не добиваат услуга каква што заслужуваат“, посочува Шукова.
Меѓу проектите што ги најавува се враќање на јавните чешми, воспоставување резервен систем за водоснабдување, како и нов концепт за управување со отпадот преку селекција, повторна употреба и намалување на количините што завршуваат на депонии.
„Ќе работиме на воспоставување ред во користењето на чистата вода и на рационално трошење на ресурсите. Паралелно, планираме 15 нови паркови за 15 месеци и воведување на БРТ системот како модерен, ефикасен јавен превоз. Скопје мора да стане зелен и поврзан град“, истакнува таа.
Во делот за загадувањето на воздухот, Шукова најавува мерки за поставување филтри на оџаците на домаќинствата и субвенционирање на граѓаните за враќање кон централното греење.
„Ако го решиме проблемот со отпадот и воведеме нов јавен превоз, ќе имаме системски ефект врз чистиот воздух. Граѓаните не бараат многу само ефикасност, транспарентност и почит. Тоа е мојата визија за Скопје“, порачува Шукова во интервјуто за „Независен“.
ПОПУЛАРНО НА ИНТЕРНЕТ...
