Управата за јавни приходи ги информира граѓаните дека во тек е активноста за генерирање и доставување на претпополнета годишна даночна пријава за утврдување персонален данок на доход за 2018 година. Даночните обврзници – физички лица, кои се регистрирани на системот „Е-персонален данок“ преку своите кориснички профили може да извршат увид во годишните даночни пријави за 2018 година. Крајниот рок за доставување на претпополнета годишна даночна пријава за утврдување персонален данок на доход за 2018 година од страна на Управата за јавни приходи до граѓаните е 30.4.2019 година.
Граѓаните имаат можност најдоцна до 31 мај да ја потврдат или коригираат претпополнетата годишна даночна пријава. До истекот на крајниот законски рок граѓанинот може да го менува статусот на пријавата, односно да ја потврдува или коригира сè до истекот на крајниот рок 31.5.2019 година. По истекот на законскиот рок на 1 јуни, годишните даночни пријави ќе добијат статус на конечни даночни пријави во согласност со последниот статус на годишната даночна пријава – потврдена или коригирана. На 1 јуни службено ќе бидат потврдени и годишните даночни пријави, кои од страна на граѓанинот не се ниту потврдени ниту коригирани.
Годишната даночна пријава што граѓанинот ја коригирал, а добила статус на конечна даночна пријава, ќе треба да биде одобрена од службено лице на Управата за јавни приходи. Доколку службеното лице не ја одобри пријавата, ќе следува донесување решение за утврдување на персоналниот данок на доход за 2018 година.
УЈП апелира до граѓаните што оствариле приходи, а сè уште не се регистрирале на системот „Е-персонален данок“, тоа да го сторат во најкус можен рок имајќи ги предвид многуте придобивки на користењето на системот „Е-персонален данок“, како, на пример, заштеда на време, кое досега се губело пред шалтерите и во даночните канцеларии на Управата за јавни приходи.
