На покана на Премиерот на Република Македонија, проф. д-р Христијан Мицкоски, градоначалникот на Град Скопје, Орце Ѓорѓиевски, денес учествуваше на втората седница на Советот за реформи во јавната администрација.
На состанокот беше истакната потребата од иницирање длабоки и суштински реформи во функционирањето на институциите, со цел создавање современа, ефикасна и европска јавна администрација која работи во служба на граѓаните.
Изјавата на градоначалникот Орце Ѓорѓиевски Ви ја пренесуваме во целoст:
На покана на Премиерот на Република Македонија, проф. д-р Христијан Мицкоски, денес присуствував на втората седница на Советот за реформи во јавната администрација – двигателот на длабоки и суштински промени во функционирањето на државните институции.
Цврсто верувам дека Македонија може да оди напред само ако администрацијата работи побрзо, поефикасно и професионално.
Институциите мора да комуницираат меѓусебно и да работат беспрекорно и со целосна одговорност.
Новиот реформски пристап е јасно дефиниран и се темели на четири клучни принципи, како што се дигитализацијата како основен стандард во секоја институција, професионална и отчетна администрација, рационализација на процесите со значително намалување на бирократијата и целосна усогласеност со европските стандарди и практики.
Ова е визија за држава во која системот конечно работи за граѓанинот.
Со решителност и јасна насока, уверен сум дека можеме да станеме пример за функционална и европска јавна администрација.
