Европската централна банка (ЕЦБ) официјално најави целосно освежување на евро-банкнотите, со нови теми, модерна естетика и засилена заштита од фалсификување.
Дизајнот ќе се темели на два главни концепти: „Европска култура“ и „Реки и птици“.
Првата тема ќе ги опфати не само познатите архитектонски објекти, туку и личности кои оставиле трага во уметноста, науката, литературата и традиционалните занаети. Втората ќе ги слави природните богатства на континентот, симболизирајќи го неговото богатство, разновидност и издржливост.
На задната страна од секоја банкнота ќе бидат претставени европските институции, со цел да се потсети на важноста од заштита на заедничките вредности.
Во процесот учествувале експерти, дизајнери и граѓани од цела Европа. Две советодавни групи од еврозоната дале свои предлози, а над 365.000 луѓе учествувале со мислења. ЕЦБ организираше и јавен натпревар за графички дизајнери (15 јули – 18 август), а избраните решенија ќе бидат откриени во 2026 година.
Воведувањето ќе се одвива постепено, во тек на неколку години. ЕЦБ нагласува дека готовината ќе остане во употреба, а новите банкноти ќе бидат визуелно поразиграни, технолошки посовремени и значително потешки за фалсификување.
Старите серии ќе останат легално средство за плаќање и ќе се користат сè додека природно не исчезнат од оптек. Дури и по нивното повлекување, граѓаните ќе можат без рок да ги заменат во банките. Доколку се донесе одлука за официјално повлекување на старата серија, таа ќе биде објавена навремено за јавноста.
Новите дизајни се очекува да внесат свежина и симболика во еврото, при што граѓаните нема да се соочат со нагли промени – преминот ќе биде внимателно испланиран и без притисок.
НАЈЧИТАНО НА ИНТЕРНЕТ...
