Kубанската министерка за труд, Марта Елена Феито Кабрера, беше принудена да поднесе оставка откако изјави дека во Куба нема просјаци.
Министерката тврдеше во парламентот дека „нема просјаци“ во земјата и дека луѓето што пребаруваат ѓубре го прават тоа за да „заработат лесни пари“.
Овие изјави, дадени за време на парламентарната седница, предизвикаа остри критики од Кубанците во земјата и во дијаспората и предизвикаа реакција на претседателот Мигел Дијаз-Канел. Министерката набргу потоа поднесе оставка.
Во понеделник, Феито Кабрера, обраќајќи се пред парламентарната комисија, рече: „Видовме луѓе што изгледаат како просјаци, но кога ќе ги погледнете нивните раце и облека, ќе видите дека се маскирани… Нема просјаци во Куба“.
Таа додаде дека „нашле лесен начин на живот, заработувајќи пари без работа“. Нејзините изјави беа емитувани во живо на државната телевизија. Таа, исто така, ги обвини оние што копаат низ ѓубре за „нелегално собирање и продажба на отпад“.
Нејзините зборови предизвикаа гнев и негодување, како и впечаток дека владата е бездушна, авторитарна и целосно отуѓена од секојдневните проблеми на Кубанците. Неколку кубански активисти и интелектуалци објавија отворено писмо во кое побараа нејзино разрешување и ги нарекоа нејзините изјави навреда за кубанскиот народ./Извор:Makfax
