Усвојувањето на извештајот во Европскиот парламент, каде што се иззема македонскиот јазик, е дефиниција за пораз на нашата дипломатија, истакна организациониот секретар на СДСМ Мартин Костовски, во гостувањето во „Тема на денот“ на Сител телевизија.
Костовски додаде дека и во минатото, во време на владеење на СДСМ имало плеада и канонада на напади од страна на држави на македонското прашање, меѓутоа со добра државничка дипломатија македонскиот јазик и македонскиот идентитет беа суштина, бит, во Европската Унија.
“Македонскиот јазик е безбеден, идентитетот е безбеден и овој извештај нема облигаторно дејство, ама преговарачката рамка каде што македонскиот јазик се зборува во Европската унија, каде што е потпишан договорот со Фронтекс, каде што идентитетот е бетониран, има обврзувачко дејство”, истакна Костовски.
Тој нагласи дека за осуда е секој еден член на европарламентот, кој користи таков вокабулар и епитети со навреда кон македонскиот јазик.
Во врска евроинтерграцискиот процес, Костовски рече дека за се што ќе може да биде дополбителна потврда за подобра позиција, СДСМ ќе поддржи и стои на располагање како државотворна и одговорна политика, и впрочем секогаш било така.
“Со внесувањето на Бугарите во Уставот еднаш засекогаш паѓа нивната теза дека сме еден народ, а две држави, со внесувањето во Уставот се потврдува дека сме различити народи и тука ја завршуваме големата приказна. Голема придобивка е што со тоа, еднаш засекогаш тие ќе бидат Бугари, ние Македонци, Македонци кои зборуваат македонски јазик, со свој идентитет”, истакна организациониот секретар на СДСМ Мартин Костовски.
