Илон Маск го пофали американскиот претседател Доналд Трамп за неговите напори за решавање на војните низ целиот свет.
„Честитки до оние на кои им се достојни. Доналд Трамп успешно реши неколку сериозни конфликти низ целиот свет“, напиша Маск на X, споделувајќи ја објавата на Трамп од Truth Social.
Трамп во објавата се осврна на војната во Газа. „Моите претставници денес имаа долг и продуктивен состанок со Израелците за Газа. Израел се согласи на потребните услови за финализирање на 60-дневен прекин на огнот, за време на кој ќе работиме со сите страни за да ја завршиме војната“, рече Трамп.
„Катарците и Египќаните, кои работеа многу напорно за да помогнат во воспоставувањето мир, ќе го дадат овој последен предлог. Се надевам, за доброто на Блискиот Исток, дека Хамас ќе го прифати овој договор, бидејќи нема да биде подобро – само ќе биде ПОЛОШО. Ви благодарам за вашето внимание на ова прашање“, додаде тој.
Интересно е што пофалбите на Маск за Трамп доаѓаат само еден ден откако двајцата повторно се судрија околу законот за даноци и трошоци на Трамп, познат како „Големиот прекрасен закон“.
Маск јавно и остро го критикуваше законот, тврдејќи дека ќе го зголеми долгот на САД и ќе ги фаворизира застарените индустрии, и повика на создавање нова политичка партија како алтернатива на двопартискиот систем.
„Членовите на Конгресот кои ќе гласаат за законот ќе ги изгубат изборите следната година, дури и ако тоа е последното нешто што ќе го направам во мојот живот“, рече тој.
Трамп одговори со закана дека ќе ги прекине владините субвенции за компаниите на Маск и јавно го критикуваше дека без тие субвенции ќе мора да ги затвори своите бизниси и да се врати во Јужна Африка./Извор:Makfax
