„СДС и ДУИ со зголемување на ДДВ за пелетите од 5 на 18 % и со таканаречениот солидарен данок удираат по народот за да има за тендерите на Груби и Ковачевски“, велат од ВМРО-ДПМНЕ.
Според партијата, СДС и ДУИ до Собранието доставиле три закони под европско знаменце, од кои сите три, велат, се удар за народот.
– Власта планира да го зголеми ДДВ за пелетите од 5 на 18 % и со тоа да удри врз граѓаните кои се греат на пелети со 12 % поскап енергенс. Ако до лани некој трошел 40.000 денари за пелети, сега ќе треба да плати 45.000 денари. Разликата во цени оди во буџетот за Груби и Ковачевски да имаат повеќе пари за матни зделки, соопшти ВМРО-ДПМНЕ.
По ист принцип е и таканаречениот солидарен данок, со што власта бара од компаниите да се солидарни, а во исто време троши немилосрдно од парите на граѓаните за тендери и договори во 4 очи, обвинува опозициската партија.
„СДС и ДУИ по брза постапка сакаат да протнат закони со кои ќе го удрат народот и фирмите, ќе скратат од нивните средства за да има повеќе за власта“, се додава во соопштението на ВМРО-ДПМНЕ.
НАЈЧИТАНО НА ИНТЕРНЕТ...
