Дури 300 милиони работни места со полно работно време ширум светот би можеле на некој начин да се автоматизираат.
Според економистите на Goldman Sachs, ова ќе биде возможно со најновиот бран на вештачка интелигенција што предизвика платформи како ChatGPT.
Тие предвидоа дека 18 отсто од работата на глобално ниво може да се автоматизира, а ефектите ќе се почувствуваат повеќе во напредните економии отколку на пазарите во развој.
Ова е делумно затоа што канцелариските работни места се сметаат за повеќе изложени на ризик од физичките работници. Административните работници и адвокатите се очекува да бидат најмногу погодени, во споредба со „малиот ефект“ забележан во физички напорните професии или професиите на отворено, како што се градежните и услужните работи.
Во Соединетите Американски Држави и Европа, приближно две третини од тековните работни места се „изложени на одреден степен на автоматизација од вештачката интелигенција“, а до една четвртина од сите работни места би можеле целосно да бидат обработени од вештачката интелигенција, проценува Goldman Sachs.
Понатамошната употреба веројатно ќе доведе до губење на работни места, пишуваат економистите на Goldman Sachs.
Но, тие забележаа дека технолошките иновации кои првично ги раселеа работниците, исто така, создадоа долгорочен раст на вработеноста. Иако работните места може да се менуваат, широката употреба на вештачка интелигенција на крајот може да ја зголеми продуктивноста на трудот – и да го зголеми глобалниот БДП за седум проценти годишно во следните 10 години, според Goldman Sachs.
– Иако влијанието на вештачката интелигенција на пазарот на трудот веројатно ќе биде значајно, повеќето работни места и индустрии се само делумно изложени на автоматизација и затоа е поверојатно да бидат дополнети со вештачка интелигенција наместо да се заменат, додаваат економистите.
Британската агенција за истражување на пазарот Sortlist анкетираше 500 компании кои користат ChatGPT од Обединетото Кралство, Белгија, Германија, Шпанија, Холандија и Франција уште во февруари, пред да се појави најновата верзија на GPT-4. Резултатите покажаа дека 26 отсто од европските технолошки компании и 22 отсто од финансиските компании планираат да ги намалат работните места како директен резултат на користењето на ChatGPT.
Работните места во маркетингот и односите со јавноста се најзагрозени, а половина од анкетираните технолошки фирми се подготвени да плаќаат повеќе од 500 евра месечно за професионалната верзија на ChatGPT. Поради најавата дека ChatGPT ќе им ги одземе работните места, групата милениумци е најзагрижена, па дури 43 отсто од анкетираните родени меѓу 1965 и 1980 година се плашат од тоа.
