Е-меилови објавени од свиркач од руската Федерална служба за безбедност (ФСБ) откриваат дека руски официјални претставници разговарале за потенцијалната употреба на нуклеарно оружје во војната со Украина. Електронската пошта е со датум од 17 март, 21 март и 12 април. Агентот на ФСБ, наречен „Ветрот на промени“, му ги испратил на Владимир Осечкин, руски активист за човекови права кој ја води страницата за борба против корупција Gulagu.net.
Свиркачот првпат го контактирал Осечкин на 4 март, а во неговите најнови писма од ноември открива дека се води војна меѓу сојузниците на Путин. Игор Сушко, извршен директор на Wind of Change Research Group, непрофитна организација со седиште во Вашингтон, ја превел кореспонденцијата од руски на англиски јазик, пишува Newsweek.
Писмата се објавени неколку месеци пред Путин да се закани дека Русија е подготвена да употреби нуклеарно оружје за да го одбрани својот „територијален интегритет“. Американскиот претседател Џо Бајден на 6 октомври изјави дека ризикот од нуклеарен „армагедон“ е на највисоко ниво од кубанската ракетна криза во 1962 година.
Во е-маилот од 17 март, напишан само неколку недели по почетокот на војната, изворот рече дека ФСБ се надева оти иако конфликтот со Украина е „надвор од логиката и здравиот разум“, сепак „нема да биде направена чиста глупост“ – мислејќи на употреба на нуклеарно оружје. „Ветрот на промени“ изрази сомнеж дека Путин навистина ќе го стори тоа, бидејќи Русија „исто така ќе биде на удар“.
„Масивен нуклеарен напад: дури и да претпоставиме дека е технички возможно, дека сите алки во синџирот ги следат сите наредби, во што веќе не верувам, тоа сè уште нема смисла. Таквиот удар би ги погодил сите“, напишаа тие.
Во меилот неколку дена подоцна, извор од ФСБ рече дека употребата на тактичко нуклеарно оружје против Украина ќе значи „пораз на Русија“ во очите на противниците и неутралните земји.
„Тоа би демонстрирало воена слабост, која ниту воениот успех не може да ја надмине“, напиша Ветрот на промени, додавајќи дека Путин може да се закани со употреба на нуклеарно оружје за „можно заплашување на Западот“.
Нуклеарен удар на Путин во војната со Украина „нема да постигне ништо“ и може да „предизвика такви последици што нема смисла да се земат предвид“, пишува во меилот на „Ветрот на промени“ од 12 април. Свиркачот, исто така, сугерираше дека командниот синџир во Кремљ би го блокирал Путин доколку тој некогаш се обиде да нареди нуклеарен напад.
„Односно, ако е тоа „технички возможно“, за што нема сигурност. Поточно, за почеток, би била потребна согласност од сите вклучени (во извршувањето на нуклеарен напад), што изгледа комплицирано“, се објаснува во кореспонденцијата внатре во ФСБ. Русија, исто така, би морала да го изврши нападот на начин „да не добие подеднакво таква ракета што ќе ја погоди точката за лансирање“, и да размисли за интервенција од други нации до руската територија, се вели во е-поштата.
А проектилите и понатаму ќе мора да стигнат до своите цели бидејќи пресретнувањето на такви ракети над наша територија би можело да биде непријатна „нуспојава“ што би совладал сè“, додаваат тие.
Во истата е-пошта, агентот на ФСБ го критикуваше недостатокот на стратегија на Кремљ во војната, вперувајќи го прстот кон Путин за воените неуспеси на Русија во Украина во тоа време. „Врвот на рускиот проблем сега го создаде лично Путин – со фактот што тој ги става своите политички барања над секоја целесообразност: воена, социјална, економска“, напишале тие.
Макс Бергман, директор на европската програма во Центарот за стратешки и меѓународни студии (ЦСИС), претходно изјави за Newsweek дека верува оти Путин сега „очајно бара некаков начин да го промени овој конфликт“.
„Постои голема фрустрација што ги имате овие огромни резерви на нуклеарно оружје, кои сега се некако ирелевантни – не можете навистина да го користите, а сè што можете да направите е да се заканите дека ќе го употребите“, рече Бергман.
Аналитичарот додаде дека верува оти е поверојатно Путин да прибегне кон употреба на нуклеарно оружје или да се закани дека ќе го стори тоа доколку неговата делумна мобилизација на руските резерви се покаже како неефикасна во војната.
Г.Т.
извор Civilmedia.mk
