Тутунската мафија за која има и предмет во Царинската управа, но и во ЈО, е заштитена од оној што се јави неповикан да се пере од потенцијалниот криминал, Љупчо Николовски, вицепремиер за спречување корупција, обвини на денешната прес-конференција, портпаролот на ВМРО-ДПМНЕ, Димче Арсовски.
„Избегнувањето на одговорите и бегањето од одговорност бидејќи сега ја штити власта за ваквиот криминал, не значи дека нема да следи одговорност за сето ова понатаму. Ова е криминал од милионски размери, кој не може да остане вака“, нагласи Арсовски.
Според партискиот портпарол, стравот на вицепремиерот Николовски и неговите, како што рече, манипулативни реакции и изјави, се поради паника да не бидат откриени до крај целиот скандал и неговата вмешаност од времето кога бил министер за земјоделство.
„Само исплашен човек, кој е замешан во ваков скандал, реагира вака, неповикан да се објаснува и да им се заканува на медиуми и новинари“, посочи Арсовски, кој потенцира дека за тутунската мафија мора да има одговорност и повика политичарите да ги тргнат рацете од новинарите и да ги остават да си ја работат својата работа.
