Скопското основно јавно обвинителство во врска со инцидентот во скоскиот локал „Трибека“ поведе постапка против дајца сокопјани на возраст од 19 и 28 години, за кои постои сомнение дека сториле кривично дело – насилство.
Како што информираат од обвинителството, осомничените на 20 февруари, околу 19:30 часот, во просториите на угостителскиот објект ги малтретирале, грубо навредиле и ја загрозиле сигурноста на две лица.
Воедно, кај останатите присутни предизвикале чувство на несигурност, загрозување и страв.
Осомничените заедно со еден од оштетените влегле во објектот, седнале на маса и го повикале вториот оштетен да им се придружи.
Откако и тој дошол на масата, еден од осомничените веднаш започнал со тупаници да го удира по лицето.
На ваквите дејствија се спротивставило лицето кое заедно со нив влегло во локалот, но насилниците почнале и него да го удираат со тупаници по лицето и носот, нанесувајќи му тешки повреди.
Веднаш потоа, еден од осомничените изреволтиран од фактот што една од гостите зборувала по телефон, започнал да ја навредува, го зел нејзиниот телефон и го скршил, а потоа започнал да го крши и инвентарот во угостителскиот објект.
Јавниот обвинител до Основниот кривичен суд Скопје поднел предлози за определување на мерка притвор за осомничените.
