Шпанските власти ја отворија можноста за привремено ограничување на работата на TikTok по истрага во која биле откриени голем број сомнителни профили и содржини поврзани со сексуална злоупотреба на деца. Министерството за млади и деца побара надлежните институции да ги разгледаат наодите и можните мерки за заштита на малолетниците.
Истражувањето на организацијата Maldita.es опфатило 35 дена следење на платформата. Според објавените резултати, биле идентификувани повеќе од 20.000 сомнителни профили и над 1.000 видеа со содржини поврзани со сексуална злоупотреба на деца.
Министерството побарало постапување од Обвинителството, а од TikTok се очекуваат информации за механизмите за откривање и отстранување на незаконски содржини. Компанијата побарала пристап до податоците од истрагата за да може да ги идентификува спорните материјали. Можното суспендирање на платформата засега е прашање што се разгледува, а не веќе спроведена забрана.
