Прашањето за проширувањето на Европската Унија и политичките пречки што го придружуваат пристапниот процес беше една од главните теми на средбата меѓу македонската претседателка Гордана Сиљановска-Давкова и литванскиот претседател Гитанас Науседа.
Разговорот се одржа на маргините на Парискиот мировен форум, каде што беше нагласено значењето на реформите и исполнувањето на европските критериуми како основа за напредок на земјите кандидатки. Во тој контекст беше отворено и прашањето за билатералните спорови кои можат да го отежнат процесот на интеграција.
Двајцата претседатели се согласиле дека проширувањето треба да се заснова врз објективни критериуми и постигнатите реформски резултати. Македонската страна продолжува да бара европската перспектива на државата да не зависи од дополнителни билатерални условувања.
