Повторувањето на гласањето на вонредните парламентарни избори, одржано вчера на 53 избирачки места во Србија, доведе до промена во распределбата на пратеничките места во Народното собрание на Србија во споредба со проекциите што претходно ги објави Републичката изборна комисија, соопшти организацијата на граѓанското општество CRTA.
Листата „Усаме Зукорлиќ (СПП) – Движење за помирување“ обезбеди едно пратеничко место, објави CRTA на Инстаграм. Од друга страна, листата „Студентска листа – Студентите победуваат“ ќе има едно место помалку, со што вкупниот број на нивни пратеници изнесува 140.
Според моменталните податоци, листата „Александар Вучиќ – Обединета Србија“ ќе има 103 пратенички места. По две места ќе добијат листите „Сојуз на војводинските Унгарци – Д-р Балинт Пастор“, „Албанска коалиција“, „Расим Љајиќ – Човечки (СДП-ЦДП)“ и „СДА на Санџак – Чувари на Санџак“.
„Со оглед на тоа што разлика од само 12 гласа беше одлучувачка за листата на Зукорлиќ да освои пратеничко место, наводите за купување гласови во нивна корист се уште позагрижувачки“, истакнаа од CRTA. Вреди да се потсети дека излезноста на вчерашното повторено гласање на 53-те избирачки места изнесуваше 44,9 отсто./Извор:Makfax
