Шефот на српската Служба за борба против организиран криминал, Марко Зафировиќ, бил повикан на информативен разговор во полицијата во врска со случајот „Сењак“. Информацијата ја објави српскиот портал Нова.рс, повикувајќи се на свои извори, а ја пренесоа и македонски медиуми.
Според објавените информации, поканата следувала по налог на Специјалното одделение за сузбивање на корупцијата при Вишото јавно обвинителство во Белград. Случајот се однесува на сомневања за злоупотреби и попречување на истрага поврзана со убиството на Александар Нешовиќ во мај годинава.
Претходно биле уапсени двајца високи полициски функционери, Марко Кричак и Бошко Секуловиќ. Надлежните органи продолжуваат да ги проверуваат околностите, вклучително и наводите за незаконско постапување при испрашување на сопственик на ресторан. Зафировиќ е повикан во својство на граѓанин, што само по себе не значи дека е осомничен за кривично дело.
