Лидерите на Европската унија ѝ честитаа на „Студентската листа“ за победата на предвремените парламентарни избори што се одржаа вчера во Србија.
Тие ветија помош во спроведувањето на реформите и изразија поддршка за Србија на нејзиниот пат кон членство во ЕУ. Претседателката на Европската комисија, Урсула фон дер Лајен, и претседателот на Европскиот совет, Антонио Коста, објавија заедничка порака на платформата X.
„Денес, граѓаните на Србија излегоа во рекорден број за да ја обликуваат иднината на својата земја. Ѝ честитаме на ‘Студентската листа’ за победата на парламентарните избори. Подготвени сме да ги поддржиме реформите во областите на владеењето на правото, слободата на медиумите, борбата против корупцијата и зајакнувањето на демократските институции, како и заеднички да работиме на напредокот на Србија кон иднина во рамките на Европската унија“, изјави Урсула фон дер Лајен.
Европската комесарка за проширување, Марта Кос, исто така ѝ честиташе на „Студентската листа“ за победата, сугерирајќи дека за Србија можеби започнува ново поглавје. „Србија јасно го кажа своето“, напиша Кос, истакнувајќи дека граѓаните излегле на гласање во голем број по речиси две години протести, за време на кои барале демократија, владеење на правото и дејствување против корупцијата. Таа нагласи дека ова се основните вредности на Европската унија.
„За Србија може да започне ново поглавје. Вратата на ЕУ е отворена и подготвени сме заедно да чекориме напред“, изјави Кос во обраќањето до словенечките дописници во Брисел.
Унгарскиот премиер Петер Маѓар објави на X дека телефонски разговарал со лидерите на „Студентската листа“ и им честитал за победата. „Им ја пренесов поддршката од Унгарија. Беше охрабрувачки да слушнам колку сила им дала нашата победа во април за време на оваа тешка борба“, напиша тој.
Претходно, тој истакна дека по објавувањето на победата на „Студентската листа“, на улиците низ Србија започнале прослави. Притоа, тој како да алудираше на сопствената победа над Виктор Орбан – унгарскиот премиер кој е близок со Александар Вучиќ. „Дали ова ви звучи познато?“, додаде тој. Генералниот секретар на Советот на Европа, Ален Берсе, им честиташе на победниците и ја поздрави одлуката на претседателот Вучиќ да го прифати резултатот и да изрази посветеност на мирна, демократска транзиција.
„Советот на Европа е подготвен да соработува со демократски избраното раководство на Србија за зајакнување на човековите права, демократијата и владеењето на правото. Вашата упорност, енергија и посветеност на европските принципи и на иднината на Србија ве доведоа до оваа точка. Можете да сметате на нашата поддршка“, напиша Берсе на платформата X.
На изборните резултати реагираше и хрватскиот пратеник во Европскиот парламент, Тонино Пицула – известувачот на Европскиот парламент за Србија и член на СДП. На X, тој напиша дека граѓаните на Србија вечерва, со убедливо мнозинство, одлучиле каква иднина сакаат. „Проценката на изборниот процес треба да им се препушти на набљудувачите, но волјата на гласачите заслужува целосна почит. Сега е време за владеење на правото, реформи и институции што им служат на сите граѓани. Ова треба да биде патот кон ЕУ“, изјави Пицула./Извор:Makfax
