Шпанскиот премиер Педро Санчез распиша предвремени општи избори за 29 ноември; оваа одлука ја соопшти утрово во вонредна официјална изјава од палатата „Монклоа“.
Одлуката доаѓа само три дена по големиот парламентарен пораз на неговата малцинска влада, при што пратениците отфрлија два клучни декрети со кои администрацијата на Санчез се обидуваше да се справи со сè подлабоката станбена криза.
Тоа значи дека тековниот мандат на шпанското законодавно тело ќе заврши околу девет месеци пред предвидениот рок.
Владата загуби две клучни парламентарни битки
Непосреден повод за одлуката беше гласањето одржано во петокот. Конгресот на пратеници ги отфрли двата владини декрети за станбената проблематика.
Првиот пакет беше отфрлен со 172 гласа „за“ и 178 „против“, додека вториот доби 166 гласа „за“ и 184 „против“. Конзервативната PP, екстремно десничарската Vox и каталонската партија Junts гласаа против двата пакета. Во однос на вториот декрет, против гласаа и PNV и Coalición Canaria.
Од особено значење за малцинската влада на Санчез беше ставот на Junts – партијата на Карлес Пучдемон – чии гласови беа клучни за усвојување низа закони од почетокот на овој мандат.
Непосредно пред гласањето, Junts побара од владата да ги повлече двата декрети и повторно да преговара за нивниот текст. Владата одби и сепак пристапи кон гласање за предлозите.
Што се обидуваше да промени Санчез?
Декретите содржеа низа мерки насочени кон ублажување на станбената криза, која во последните месеци стана едно од главните политички прашања во Шпанија.
Меѓу другото, тие предвидуваа продолжување на заштитата на ранливите граѓани од присилно иселување до крајот на 2030 година, продолжување за две години на одредени постоечки договори за закуп, построги правила за краткорочно и сезонско издавање и ограничување на купувањето станови од страна на компании и фондови што владата ги смета за шпекулативни./Извор:Makfax
