Јапонската метеоролошка агенција издаде денеска посебно предупредување за обилни дождови за некои области во префектурата Фукуи, во централниот дел од земјата, а околу 111.000 луѓе во пет општини се повикани да се евакуираат поради поплавите.
Околу 244.000 луѓе се предупредени да преземат итни безбедносни мерки поради лизгање на земјиштето и возила заглавени на поплавените патишта.
За градовите Фукуи, Оно и Кацујама е издадено предупредување од ниво 5, што е највисоко ниво на предупредување за обилни дождови кое укажува дека е веројатно да се случи катастрофа или таа е неизбежна, но подоцна е намалено на ниво 4, кое и натаму подразбира дека неопходна е евакуација на населението.
Во последните 24 часа до изутринава, во Кацујама, Сакаи и Фукуи има рекордни врнежи од дожд од над 300 милиметри. Министерството за земјиште, инфраструктура, транспорт и туризам најави дека размислува за испуштање вода од браната Сакаи за да се обезбеди повеќе простор бидејќи се зголемува нивото на водата./Извор:Makfax
